प्रधानमन्त्री पुष्पकमल दाहाल ‘प्रचण्ड’ ले शुक्रवार विश्वकप क्रिकेटको क्वालिफायरमा छनोट भएका नेपाली खेलाडीहरूलाई सम्मान गरेका छन् ।शुक्रवार बालुवाटारमा सम्मान गर्दै जनही तीन लाख राशिको पुरस्कार घोषणा गर्दै प्रधानमन्त्रीले भने, ‘मलाई अत्यन्त खुसी लागेको छ। हिजो तपाईँहरूले जसरी प्रदर्शन गर्नुभयो, त्यसबाट तपाईँहरूले मात्र जित्नुभएको छैन, देशले जितेको छ। देशको स्वाभिमान उच्च भएको छ, राष्ट्रको गौरव बढेको छ।’प्रधानमन्त्री दाहालले भने, ‘यसअघि पनि सरकारले तपाईँहरूलाई जनही दुई लाख राशिले पुरस्कृत गरिसकिएको छ। आज म तपाईँहरूलाई जनही ३ लाख रुपैयाँको पुरस्कार प्रदान गर्ने घोषणा गर्दछु।’नेपालले एक महिनाको अन्तरमा अद्वितीय प्रदर्शन गर्दै १२ मध्ये ११ खेल जितेको थियो । जसमा घरेलु मैदानमा भएको पछिल्लो दुई शृङ्खलाको चारै खेल जित्दै क्लिन स्वीप गरेको थियो भने युएईमा भएको शृङ्खलाका चारमध्ये तीन खेल जितेको थियो ।