सोलुखुम्बुमा नेपालकै पहिलो अन्तराष्ट्रिय लेभलको रक क्लाम्विङ प्रतियोगिता हुने भएको छ । जिल्लाको माप्य दुधकोशी गाउँपालिका ५ नम्बर वडामा रहेको महभीरमा आगामी असार ३ र ४ गते माप्य महभीर खुल्ला रक क्लाम्विङ प्रतियोगिता २०८१ को आयोजना गरिदैछ । जसका लागि माप्य दुधकोशी गाउँपालिका र नेपाल आरोहण खेल संघ बिच सम्झौता समेत भईसकेको छ ।
साहसिक खेल रक क्लाम्विङद्धारा आन्तरिक तथा बाह्य पर्यटकको आकर्षण बढाउने मुख्य उदेश्यका साथ यो प्रतियोगिता संचालन गर्न लागिएको माप्य दुधकोशी गाउँपालिका अध्यक्ष बुद्धिकिरण राईले बताएका छन् । प्रतियोगितामा अन्तराष्ट्रिय क्लाईमरहरुको समेत उपस्थिती रहनेछ । माप्य दुधकोशी गाउँपालिका भौगोलिक रुपमा विकट र दुर्गम भएता पनि पालिका भित्र पर्यटकीय, व्यवसाहि, सांस्कृतिक, वातावरणीय लगायतका विभिन्न बहुआयामिक सम्भावना र पक्षहरु महत्वपूर्ण पहिचानको रुपमा रहेकाले यसको थप विकास र प्रबर्धनका लागि रक क्लाम्विङ प्रतियोगिताको आयोजना गर्न लागिएको अध्यक्ष राईको भनाई छ । यो प्रतियोगिताले माप्य दुधकोशी गाउँपालिकामा मात्र नभई सिंगो जिल्लामा नै पर्यटन प्रबर्धनमा टेवा पुग्ने उनको विश्वास छ ।
माप्य महभरी खुल्ला रक क्लाम्विङ प्रतियोगिता २०८१ सञ्चालनार्थ गरिएको सम्झौता पत्रमा माप्य दुधकोशी गाउँपालिकाको तर्फबाट पालिका अध्यक्ष बुद्धिकिरण राई र नेपाल आरोहण खेल संघको तर्फबाट अध्यक्ष हरि प्रसाद धरेलले हस्ताक्षर गरेका छन् । आज (बुधबार) काठ्माडौमा एक कार्यक्रममा बिच रक क्लाम्विङ प्रतियोगिताका लागि दुई पक्षबिच सम्झौता भएको हो ।
सोही अवसरमा बोल्दै नेपाल आरोहण खेल संघका अध्यक्ष हरि प्रसाद धरेलले खेल र पर्यटनलाई संगसंगै अघि बढाउने माप्य दुधकोशीको महान योजना संचालन गरेको त्यसमा आफुहरु पनि जोडिन पाउदा खुसी लागेको बताएका छन् । प्रतियोगिताका लागि सम्झौता भए पनि विजेताका लागि पुरस्कार भने घोषणा गर्न बाकि रहेको पालिकाले जनाएको छ ।
